安仔否認有新女伴「翻版張茜」

東方日報  2002年11月26日(星期二)

許志安與鄭秀文是否甩拖？令人撲朔迷離，昨日有報道指他已有新女伴「翻版張茜」，並與張衞健一家一起食飯，昨日安仔、健仔、吳國敬及一位朋友結伴出外度假，在機場他特別澄清那個女仔是張衞健媽咪的契女，指該報道根本是「屈」他。

安仔說：「我演唱會都攬住好多女記者影相，咁咪好多女朋友？（怕唔怕Sammi呷醋？）唔好掃興，我要去度假。」之後記者再追問，他一時口快說：「健仔係佢契媽。」他知道講錯後，笑著解釋：「健仔媽咪係佢契媽，（係咪好熟？）朋友囉。」同行的健仔亦表明那個女仔係媽咪o既契女，即係佢o既契妹。

安仔之後在電話中澄清，一向與健仔像一家人，所以她媽咪的契女，亦成日在聚會中出現，不過兩人無發展可能。

至於為何攬住對方？安仔說：「因為我隻碟有杯送，佢叫我記得送隻杯俾佢，我應承咁咪拍一拍佢，咁樣拍一拍就叫新女伴？咁第日有人生日，我錫一錫個壽星女，咪連仔都要生埋？」

唔想俾人話宣傳
至於他與Sammi係咪分手？他說：「我唔會答呢啲嘢，咁我以後出街就要好似黃允材將對手放係背面，或者好似盧海鵬將雙手插喺個袋。（咁點解演唱會唔見Sammi出現？）慶功嗰晚講過，如果我叫佢，佢會唔會唔嚟呀？有人話我做演唱會借佢宣傳，我就係唔想俾人話我博宣傳啫。」

安仔與吳國敬、張衞健昨日出發往泰國度假。