Air Jordan XX3

上個星期(即一月中), 係hk-kicks.com見到香港有機會買到Air Jordan XX3 Premier限量版, 心諗, 呢D鞋邊到我去擁有呀? HK$1,799喎, 買到都未必著, 唔著又唔知買o黎做咩! 家中雖然多鞋, 但係每一對都有著過, 而且仲要係要o黎打波添!

到咗唔知17定18號, 得知道需要影一張相去顯示對Jordan既狂熱, 仲要出埋樣同寫五十字! 喂大佬呀, 鬥狂熱, 人地十萬八千對啦, 仲要對對都未著過都仲有, 你話邊有得鬥? 一心諗住疊埋心水放棄之際, Michael打電話o黎話不如一齊參加! 好! 咁我就唯有獻吓醜, 捨命陪君子啦!

諗咗好耐都唔知點影好, 鬥多, 我得果三, 四十對, 死硬! 仲要屋企無大地方show晒出o黎影! 後來唔知點解, 又或者唔記得邊個提議, 不如轉sell溫情啦! 好, 星期六即刻捉咗阿偉個女o黎影, 仲要係父女裝果隻! 同小朋友影合照真係好難, 佢成日唔肯望鏡頭, 仲要不停餵佢食餅, 等佢唔好扭計! 影咗三, 四十張先揀到D......

22號晚11點開始可以係nike.com.hk遞交作品, 我果晚番到屋企即刻就填啦! 點知第日發覺原來填錯email地址, 好彩仲有得改! 23號晚食完飯, 諗諗吓不如搵埋首領一齊填, 多個機會都好, 加上佢屋企都有三對Jordan, 10點半左右影完相交埋o岩o岩趕得切! 番到屋企, 發現自己入咗頭三十五最佳作品, 都幾開心架, 起碼有個機會成為二百三十個合資格人士啦!

24號我同首領都收到email, 話係二百三十個合資格人士之一喎, 有機會被抽中, 可以買廿一對AJ XX3 Premier既其中一對! 但係首先要25號中午12點至晚上7點到旺角允記登記, 再到晚上11點係番旺角允記抽獎! 喂大佬, 12至7喎, 唔駛做咩? 放工又唔知放幾點, 仲要係鰂魚涌去旺角....... 原本諗住lunch hour去登記, 好彩收到個email話可以12至8! 正! 可以放工先去!

咁我同首領就7點零鐘由鰂魚涌出發, 好衰唔衰, 今晚地鐵超多人, 仲要每個站度門都開三四次, 好彩最後7點53分到達旺角允記, 成功登記, 如果唔係, 殺人都有之! 我張飛, 係92號, 而首領果張, 係91號! 首領其實公司D野未做完, 所以係咁倚係旺角食咗個麵就番番鰂魚涌, 而我就要去銅鑼灣同D一月生日既同事食生日飯! 其實阿首領去到太古站, 都9點鐘架啦......

9點9, 我就打俾首領提佢差唔多啦喎; 10點正, 再打俾佢叫佢走, 咁我地未一齊再搭地鐵再去旺角允記囉! 今次快好多, 我地10點半左右去到, 已經有好多人係度; 行一行都10點9, 未直頭企係門口等囉! 都幾慘架, 得果十一, 二度, 仲要落緊毛毛雨喎! 不過我估大家都唔係好凍, 因為太緊張啦!

11點啦, 終於開始抽啦, 逐五個逐五個咁抽...... 第一批無......第二批無......第三批, 第十四位, 91號! 91號! 無錯係91號! 全靠首領, 我先可以買到一對10號! 我原本著開10號半既, 但係無晒10號半同11號, 咁就算啦! 跟著第十五位至第廿一位, 都唔係Michael既221同我既92啦......

鞋就買咗啦, 要借呢個機會多謝大家:

(1) Nike HK - 好野, 咁都俾你班到廿三對番o黎! 仲要俾我抽到, 証明無造馬!

(2) Michael - 如果唔係你話玩, 我未必會參加囉! 講真, 如果我有多一對, 我一定HK$1,799賣俾你!

(3) 阿偉一家三口 - 攪你地半日, 唔好意思! 最慘係, 晴晴好可能又俾豬叔叔餵肥咗!

(4) 公司同事 - 多謝大家俾我早走!

(5) 曾經祝過我好運既人 - 多謝!

(6) 首領 - 風吹雨打, 得果十一, 二度, 仲要鰂魚涌旺角鰂魚涌旺角! 同埋你果張91號飛! 下次同你去i.t.行街, 最多我唔打喊露啦! 如果AJ XX3 同你一齊跌落海, 我知道要救邊個先既! HK$1,799其實唔算好貴, 不過就一定係我地兩個心中一個美好回憶!

圖一. 張詠晴與豬叔叔		圖二. 91號飛與92號飛
圖三. 華麗的鞋盒		圖四. 10號, 都無計
圖五. 盒內有彷Jordan指紋		圖六. 仲可以講咩?
圖七. Premier 有高级木質鞋撑		圖八.鞋底都好detail

2008年1月26日4點57分