| Kort nadat die Boere by Malipspoort aangekom het, kom daar
twee Britse boodskappers na hulle om ‘n boodskap van die Staatskommisaris
van die Zuid Afrikaanse Republiek af te lewer. Die boodskap het versoek
dat die Britte die Staatskommisaris vrye deurgang sou gee, sodat hy die
Boere kommando kon besoek. Die kommando het daarop ‘n begeleiding gestuur
om die Staatskommisaris by die vyand te gaan haal.
Die Staatsekretaris het aan die kommando gesê “Burgers, ek is deur ons regering gestuur om die Soutpansberg kommando te kom ontmoet en julle mee te deel hoe ons sake staan. Die Staatspresident het onderhandelinge gehad met die generaal van die Britse kant, naamlik Kitchener. Van die Britse kant wil hulle graag vrede maak, maar hulle wil nie ook die land terug gee nie. Hulle wil hê dat ons die land moet opgee. Dit het ons geweier. Ons het aan die opperbevelhebber van die Britse kant gesê, ons het geen reg om die land oor te gee nie. Dit is die volk s’n. Toe het hy ons vrye begeleiding gegee om per trein na die verskillende kommando’s te gaan om die volk se gevoelens te hoor en dan ‘n afvaardiging deur die lede te laat verkies om ‘n konferensie by Vereeniging te gaan hou ten einde vrede te maak. Dit lê in die volk se hande of die volk die land wil opgee of verder veg.” Eenparig word daar gesê “Verder veg, of onafhanklik vry!” Beyers en Landros Stoffberg word toe verkies as verteenwoordigers van die Soutpansberg kommando verkies om die vredesonderhandeling by Vereeniging by te woon. Beyers en die afvaardiging het te perd langs die Olifantsrivier na Vereeniging gegaan, terwyl die manne wat by Malipspoort agter gebly het almal voetgangers was. |