| ‘n Paar dae nadat Generaal Beyers en die berede kommando
hulle verlaat het, stuur die vyand weer ’n groot mag die berge in om die
voetgangers te gaan vang. Kolonel Colenbrander was self in bevel van die
Britse kommando wat die Boere aangeval het. Die Britse kommando het uit
ongeveer 3,000 Britte, ‘n klomp joiners, en baie swartes bestaan.
Vroeg in die môre van 6 Mei 1902 het Sagrys de Beer en Jacobus Potgieter uitgegaan om die gebied te gaan bespied. Hulle het al met die berg langs beweeg, vanwaar hulle ‘n goeie uitsig oor die vlaktes gehad het. Vanaf die hoogtes het hulle die vyand se perde kommando in hulle rigting sien aankom en die voetgangers gaan waarsku. Die geveg het die hele dag geduur. Teen sononder het die vyand geprobeer om hulle te omsingel. Die Britte het die rivier beset en hulle daardeur afgesny van hulle verbinding met water en kos. Toe dit donker word, vlug die Boere oor die berge, na die weste om daar water te gaan soek. Eers sowat twee uur in die nag het hulle water gevind. Teen daardie tyd was die Boere al goed dors. Die Boere kommando het vir die res van die nag daar by die water geslaap. Sowat agt uur die volgende oggend het nog burgers wat ook al baie dors en honger was, by die voetganger kommando aangesluit. Die Boere was die vorige dag deur die vyand verras en hulle het nie tyd gehad om kos of water bymekaar te maak nie. Hulle het die hele dag geveg en die hele nag gevlug sonder enige kos of water.  |