Vulina taba maraviellada colo qu’oyía, y nengunu de los dos foi a decatase qu’aportare Wanics trayendo comida fresco. Esta vuelta tratábase d’un coneyu que dixo garrar na so lluriga. Lo ciertu ye que Wanics amosábase comu home mañosu asgaya.
Prepararen la comida, y demientres cenaben, siguió cuntando Aedrics coses de la so ciencia máxica.
— "¿Sabes, Vulina? Na druidada nun tolos díes son iguales".
— "¿Queréis dicime, mayestru, que tenéis mas díes de feria que nos?".
— "Non, muyer, non. Nada tien de ver esto de lo que te voi falar colos díes de feria" —sorrió prestosu Aedrics, baxu la sollerte mirada de Wanics— "Comu ya te desplicare, nós midimos el tiempu y los socesos que trai, per kóronos y llunes. Pero lo que nun te dixe ye que pa nos, cada lluna ta divida en cuatru cachinos de tiempu iguales que nomamos "menr", y que cada "menr" caltien siete dies. Y cada dia del "menr" tenémoslu consagráu a una estrella, sacantes el Sol y la Lluna, que tienen díe propiu".
Vulina dexó de rucar la pata coneyu cola qu’andaba, pa entrugar:
— "Nunca oyere falar que los díes d’una lluna tovieren consagraos a estrelles. En pueblu, cuntamos los díes de cada lluna, y col entellunu, entamamos de nuéu. Si la druidada da nomes a los dies, ¿por qué ye? ¿Tien ello dalgún valor?".
— "Bono, pal arte máxicu ye perimportante saber sátamente el díe que ye dientru d’una lluna, porque los díes tan gobernaos poles estrelles que los nomen. Asina ye que nun da igual escoyer el díe de guarimientu o invocanza si el que lo fai, o el que recibe el dau, nun tan baxu l’abellugu de la estrella del die".
— "Parezme daqué rebesoso de siguir, mayestru" —dixo Vulina daqué empapizada, y non pol cachu coneyu que rucaba.
— "Tranquila, Vulina" —rió Wanics— "¿Nun queríes ser druida? Pues esto nun ye namái que l’aniciu. Si yes ellexida nel llagu, barrunto pa mín que’n diez estaciones emprimarás a pescanciar dalgo".
Y soltó una esgargayada que retumbeyó na cuerria y la so redolada, mentantu poníase de pies y colaba a ver a Sairina, que taba al abellugadoriu, un pocu más pellá d’ú traxinaben.
Comu viera Aedrics que la moza fincaba silenciosa, preguntó-y escacipleru:
— "¿Dalgún esmolecimientu, ne?"
— "Nun sé, mayestru. Camentaba que la druidada yera pocu más que l’arte guaridor, y agora veo que ye camín anchu y espurriu, comu ya me dixisteis..."
Aedrics non la dexó siguir, pues encabóxola p’arrepostiá-y
— "Nun t’enfalles, Vulina. Ye ciertu que ye camín espurríu y anchu en conocencies, pero ello nun val un res si aquelli que recibe los sos daos nun tien, igualmente, grande y espurríu el so corazón. Y tu tiéneslu."
Llevantose Aedrics pa espurrir les patuques, esprecetándose al empar, y encamentó-y a Vulina que, comu yera tiempu de dormir, fuere ver a Wanics por si necesitare axuda con Sairina.
— "Cada díe que pasa, viendo lo muncho que s’esfuercia Wanics cola moza, y lo poco qu’algama col so estribe, pésame mas el tenela con nós". —dixo Aedrics falando pa sigo, pero non solo pa los sos oyíos.
Vulina foi cumplir lo que se-y pidiere, y el máxicu d’Ar-Bas metiose na cuerria finxos pa chucase. Enrobelláu nel so cobertoriu, púnxose pámpana enriba cruciando los bracios tres la ñucla, mirando al techu aquel que yera la grande llábana aguantada por pegollos non menos grandes. Fuera, albentestate, ruxía y restallaba la madera qu’amburaba na foguera.
Los rellumos de la foguera arrincaben curioses solombres d’aquella superficie escarapullosa y greba, que paicía ingrávida y lliviana allá enriba. La cansera facía pesaos los párpagos del máxicu, y deseyable’l sueñu bien ganáu. Y Aedrics, zarró los güeyos.
Darréu vió la so aldega d’Ar-Bas, la so palloza y al so dotrín. Tamién la cara del cabezaleru Terics, l’arrechu guerreru más corazón que tiesta, pero siempre dispuestu a oyer un bon conseyu... Curioso. Mui curioso.
Yera curioso qu’agora que taba a les puertes terrenes del Wallol, namái allampiare por tornar pal so pueblu. Ensin dubia, yera’l natural deseyu que tien tou home qu’albidra pelligros avisiegos, d’abellugase a la paz d’aú guardense los más fondos raigaños del so llar. Anque comu los brazos amorosiegos de la so Má ya ausente, nada podría comparase.
Dempués d’un tiempu, que nun fue a midir por tar nesos intres misteriosos del duermivela, xuniéronse-y nel enfotu de descansar el resto de viaxeros. Oyó a Wanics falar a Sairina, diciendo-y cosuques comu si ésta pudiere bramente oyilu, y remembro-y aquello la conversa d’un Pá cola so fía. Y oyó tamien a Vulina quexase de lo magoso del llugar, por ser sitiu empozáu.
La foguera, recién xorrascada y apinada d’amburante pa tola nueche, llucía afogada y escasa de llume encobertada pol burrayu, pañando, pasín ente pasu, el puxu qu’amosaría non tardando munchu tiempu.
Aedrics nun yera a dormir. Por dalguna razón impescanciable, masque toviere galdíu el cuerpu, nun yera a coyer el sueñu.
Taba Aedrics camentado nes coses valeres de xaciu, que davezu camenta ún por mor nun tener cosa meyor que facer, cuandu decatose que na superficie greba de la llábana que taba enriba d’ellos, podíen aldovinase, si ún tenía dalgo de maxín, delles coses curioses que se mozquiaben pol xueu de solombra y llume que les llapes de la foguera, ya esmoreciente, ya afoguerante, apurría.
Arrevelábense unes mozquetes curioses, una triba d’adebuxos fuera de lo normal. Unes formes que bien podíen ser de manu humana.
Esconsoñáu comu taba, llevantose pa veles meyor, cuidando nun facer muncho esparaván que pudiere fadiar al restu la tropiella.
Y n’efeutu, apaicieron-y más claramente unos adebuxos que remembraben a les mozquetes que fain davezu los neños nos xuegos en boldre. Mirolos y remirolos bien despaciu, moviendo la cabeza pa ser a coyer diverses formes en que podríen vese. Yera bien incomodo poder estudiales d’aquella mena, col pescuezu abangáu faza enriba, asina que camentó que sedría meyor reproducir aquellos adebuxos en suelu lo meyor posible. Darréu de pensalo, llimpió col pie de piedruques y ramascayuca’ l suelu, y foi adebuxando col gabitu d’un palucu, aquello que vía destacase d’ente la superficie greba de la llábana. Sigún lo facía, sintía una estraña excitación que nun lu dexaba pensar claro.
Un tres otru, foron apaiciendo en suelu un ensame adebuxos ensin xaciu dalu. Formes xeométriques ensin mensaxe aparente. Seis trazos en fila, y cuatru triangulucos con una mozquete ente éstos y aquellos. Embaxo d’ellos, apaicíen cuatru talladures, y enriba los triangulos, un adebuxu curiosu: una rueda alrevesada per mozqueta al siesgu, dos mozquetes más alrevesades al encruz por otra, y darréu de tou ello, la forma sinuosa d’’una serpiente, o cosa asemeyada.
Taba claro qu’aquello nun podía ser de manufechura natural, a nun ser que fuere d’aniciu máxicu, lo cualo nun había que lo descartar ya que máxicu yera’l llugar nel qu’anochaben. Pero podíen observase cláramente mozquetes de güelpes de beril.
¿Qué podría ser aquello?, yera una pregunta que-y esmolecía y que-y daba vueltes na tiesta esconsoñada. Y asina tuvo fasta que’l díe atopó al paisanín pigazando en cuclielles, cola cabeza azumbada so les rodielles, encontau escontra ún de los pegollos y col rengoyíu de sueñu profundu.
— "Eh, collaciu, dispierta. ¿Qué fais aende, hom? ¿Pásate daqué, Aedrics?. ¿Tas malu?"
Aedrics desplicó-y al collaciu lo que descubriere, siñalando-y les formes que na llábana había y qu’agora, pola lluz difusa del díe, nun se víen bien. Tamién amosó-y los adebuxos que fexo en suelu, copiando les formes de la superficie greba de la llábana.
Enclincaos los dos collacios sobro aquello qu’adebuxare’l máxicu d’Ar-Bas, miráronlo pensatibles per un bon cachu.
— "Pémeque ésto nun tien xaciu, collaciu" —comentó Wanics— "Semeyen mozquetes comu les que fain los guajes en boldre fresco cuando xueguen nes orielles los regatos, o nos caminos. Parez un xueu. Quiciabes foi dalguién con ganes trebeyar"
Aedrics fincó pensatible, pa dicir darréu:
— "Nun voi dicir que nun puea ser lo que dicis, collaciu pero pémeque fuere quien fuere, tomose trabayu enforma pa gastar una bromada. Fíxate que tá bien alta la llábana, y que pa facer los adebuxos tuvo de tirar de martiellu y buril. Pa facer una cosadiella, meyor sedría facela a l’altor de la cara, na pared por exemplu, y non en techu ¿acuei?".
Wanics encoyóse d’hombros.
Dempués de desayunar un ferviatu, y mentantu Vulina acuriosaba a Sairina y daba comer a la caballa, pasaron los máxicos de nuéu a la cuerria pa mirar meyor los adebuxos que fexere Aecrics. Siñaló ésti la mozqueta que trazaba un círculu enardáu per un llau fasta’l so centru, por aciu una mozqueta drecha.
— "Fíxate, collaciu. Tenemos lo que podría ser una serpiente. Tenemos, veamos...hmm... Tenemos un, dos, tres...cincu pines y lo que podríen ser seis palos. Tamién una cruceta de tres trabes... Tolo que veo parezme guardar relación col mundu la viesca, pero esta rueda o círculu enardáu, nun me lo parez".
— "Bono, collaciu, albidro que lo meyor ye dexalo tar. ¿Por qué vamos fixanos namái nestos escarabayos de la llábana, si tolos finxos de la redolada tan atacaos d’ellos? Hai xente mui malo" —sorrió Wanics— "y nun me lleva xera maxiname a un fuxíu, o mesmo un esclavu ociosu, faciendo una tochada nesa llábana, o en toles otres, porque nun tien cosa meyor de facer. Meyor entamamos los llabores de la invocanza y de la Pergrande Ufierta. Por ciertu, ¿vas preparar la invocanza d’Astow?".
Aedrics incorporose y asintió mentantu dicia:
— "Si, collaciu, pero fai falta cera pa facer les veles. Camento tamién que fadrá falta dalgún yerbatu y povisa de collor. M’Ar-Ilia faló de qu’enantes d’aportar a esta escampiñada atoparíemos dellos truébanos. Nun sedría mala idega que garrases un celdón y fueres a la gueta d’esi abeyar pa traer un pocu miel y cera. Yo mentantu diré facer cuentes de lo qu’inda queda nes alforxes, pa ver de pañar lo que falte".
— "Val, hom, pero a mín les abeyes danme respetu".
Viendo’l máxicu d’Ar-Bas lo llerciosu qu’amosábase’l cam-ar-mann’ud, desplicó-y bien clarín lo que tendría de facer pa remanar un caxellu abeyes, encamentando-y, ente otres coses, que llevare un calicor pa entamar un bon fumaral que-y permitiere xebrar les abeyes del truébanu y asina ser a coyer el frutu del so trabayu en sin pelligru o incomodanza.
Mas sosegáu pola desplicanza, coló animosu Wanics, y Aedrics emprimó a facer relación de lo que teníen, de lo que-yos faltaba, y de lo que nun podríen tener masque quinxeren. El Ritu Cerúleu descansa nel amburamientu d’espelma acuriosáu colos collores amañosos pa la mesma invocanza, nos arumes qu’acompanguen l’aición d’invocanza, y la pallabra canciada faciendo la ufierta y la petición.
P’algamar dalgunos de los collores y les esencies arumoses, Aedrics tendría d’ensuchar al fueu arciella, alique y dalguna otra planta y piedra, mayalos, y dexar macerar n’aceite d’oliva dalgunos yerbatos de los que tinía, anque meyor tentaría atopalos frescos, pues tiense afitao ente la druidada que la esencia de les plantes vives ye meyor pa facer dellos arumes. Nun yera trabayu rebesosu, dende lluéu, pero si cafiante.
Vulina, al empar qu’Aedrics andaba faciéndose la componenda de lo que necesitaba, foi dar una vuelta con Sairina. Convenía-y a la moza amalada que se moviere y espurriere les patuques pa non garrar gordura o amalar de los xuegos. Sacante estos cuidaos, la verdá ye que Sairina, tresvolada y n’ayen, nun ofrecía denguna incomodanza a los viaxeros. Durante tol camín, Sairina nun esistió, y fontes, viesca y caleyu vieron los enfotos y procuros que Wanics fexo col envís de sacar a la mozuca del so misteriosu tresvolamientu, Pero la ciencia de la druidada, ya inda la de la morriñada, nun yera abondo pa zucar d’aquel cuerpín mal tan gafu. Y si ya yera noxante avezase a los silencios d’aquella guapa cara inexpresiva, más lo yera pa Wanics que, supuestu depositariu de la ciencia del guarimientu, nun yera a saber qué facer pa iguar l’amalamientu.
Al meyudíe tornó Wanics contentu. Vinía con miel enforma, pañao d’unos truébanos que topare xusto al empiezu de la llende la escampiñada, comu alvirtiere M’Ar-Ilia. En cuantes qu’aportó al llugar, Aedrics comentó-y a Wanics que pa facer l’arume que tendríen de quemar xunta les veles, durante’l Ritu Cerúleu, demoraríen pelo menos tres díes, el tiempu mínimu necesariu pa morcar los yerbatos nun poquiñín d’aceite del lloñe meyudíe de la cordal, aquella arumosa sostancia que siempres llevaba y que-y remembraba les tierres ensuches de los vaqueiros d’Astyr. Tres díes, si. Diben bien vagar nel llugar, pa conocelu tamién, bien.
Darréu tener el productu de los caxellos, Aedrics xebró la miel de la cera, que fundió al agua fervollante cola axuda de los cazos que llevaben. Y col espelma fundío, y delles febres vexetales ensuches, ensiñó-y al collaciu a facer los carbinos que caltendríen la llapa.
Tres díes yeren enforma comu pa tirar cola xinta que-yos quedaba.
Dempués de tener los carabinos fechos, y tol espelma fundíu y purificáu, xulgaron los máxicos comeniente que Wanics, el fortunosu cazador, fuera ver si podía traer daqué pa fornir les ya escangallades alforxes que traíen, y que Vulina lu acompañare por si podía pañar tamién dalgo comestible de la balse....