Con bona ventilanza, y servicios enforma pa facer de la hixene propia y ayena un bon tragu, amás de bonos llares pa cocinar y apurrir agua calentino, (agua que, fluyendo peruquier, apurría un sele canciu qu’asonsoñaba la nana de la Má tierra), el sitiu yera afayaízu y prestosu. Afayaizu sí, sacantes la falta llume natural, que s’arromendaba col amburamientu d’untu y saín en candilexes asitiaes nes paredes careses del llugar. La sensación de seguranza qu’apurria el llugar yera a calmentar l’ánimu del más buiciegu.

Comu’l díe anterior la Vieya Morriñosa presaxare que finaba per un tiempu l’andancia de la borrina prieta, muncha xente coló del bellugueru (o abellugu) natural, pa traxinar nos propios llares, que xuru bona falta-yos fairía por mor del munchu estropiciu y llaceria que facía la contina engarradiella cola andancia de la borrina prieta. Poro, el llugar de la covayona namái que fincó colos amalaos y les sos families, al cuidáu de los pocos homes y muyeres que conocíen del componedoriu de los males del alma y del cuerpu. Ente ellos, pola so llibre escoyeta, los máxicos, qu’asina espurríen la conocencia guaridora, tanto ente los dotrinos, como ente los comunes, devotos por curiosidá o procuru.

Y asina, el díe dempues de falar de los yerbatos y otres sustancies del mundu muertu, vieno col cutimientu al llugar de nueva xente del esterior, con xinta y otres mercaderies propies pa alitar el cuerpu. Porque conocer el intre del díe nel que se vivía ellí dientru, nun taba nes manes propies, sinón na boca del qu’aportaba al llugar. Y si se tinía munchu esmolecimientu por saber, amás de si yera nuechi o díe, cumplíu o non, qué tal tiempu facía fuera, podía unu encolingase enriba de dalgunu de los llares muertos, pa escucar el cachín de cielu que podia arrevelase allá enrriba, al fondu de la prieta chimenea natural que daba salida a los fumos.

Wanics y Aedrics xulgaron comeniente dempués d’almorzar, espurrir les patuques d’atrás, per fuera. Y ver un pocu de lluz natural, que ya estrañaben dempués de tar sapozaos per tantu tiempu.

Asina qu’enfilaron el camín de la portiella pela qu’entraren había unos díes, y esguilando pel chupitel, xubieron les escaleres y aportaron a la cuerria que tapecía amañosamente la entrada/salida de la cueva a los desconocedores del llugar.

Y n’aportando a la clarixa del esterior, los máxicos cuntieron el frescor de la mañanina, que recibiolos cola feble rellugada que daba un sol primeru, atristayáu pel ñublón que nun yera a francer.

Charon los máxicos una fonda y llenta alendada, comu pa llenase, pasín ente pasu, de la enerxía qu’apurre l’aire netu y arumosu que trai la mañanina de la viesca magosa.

— Hummm....Esti airín llientu y vexetal.... —baborió Aedrics metiendo aire en cuerpu— Hmmm.... esti paisaxe que llora agua per dayures....humm. Esta tierra nuesa, que tolo da ensín pidir un res a cambeu.....

— Baxasti máxicu y xubes poeta, collaciu... —dixo Wanics sorriendo.

Pero Aedris, comu n’ayén, siguió falando mentantu esprecetábase con ganes

—...hai que tar llocu, pa non querer a esta tierra.....

Caleyaron los máxicos ente les cabañes cásique circulares que llamen palloces, aperiaes en piedra calizo y encubertaes con paya y piornu, qu’amosabense llientes y magoses, encobertaes pol mofu y la herba serondiega. Cases qu’a un y otru lláu del la cuerria xixilaben silentes un almanecerín friucu.

Falaron y falaron los collacios. Rieron cuandu cuadraba y fixeron los planes, que se debíen, pa colar, comu pocu, en dos díes. Namái qu’esi tiempu necesitaben pa que los dotrinos Kaircs, Wotam y Vulina tovieren afitaos la curtia conocencia del arte guaridor. Dempués, ellos podríen facer de mayestros pa espurrir el mou de tratar los males del cuerpu.

Y asina lo acordaren. Dos díes, y baxaríen col ríu, camín del gran castru bicéfalu de Les Ar-Rondes.

Tres d’el pequeñu paséu xuntos, Aedrics pidió-y a Wanics que fuera cola dotrinada a ver qué podíen tratar. Porque tovía quedaba l’asuntu d’ensiñar cómu habíen de preparase los ferviatos y emplastos que comentaren el díe anterior. Aprovechando los yervatos, agora había que ponese al llabor, y facer d’esti mundu lo que primero foi pallabra.

Y el collaciu marchó animosu, camín de la cuerria, el chupitel y la covayona.

Aedrics fincó solu.

Dempués de los fechos de los díes anteriores, necesitaba un respiru.

Concasar les idegues. Dexar los negocios humanos y fondiase, non nel agua, sinón na propia concencia pa pescanciar dafechu’l mensaxe de los dioses de la viesca. Porque aquel viaxe qu’entamare cuandu el cabezaleru Terics noxose de veres con elli polos fechos de la balse y la impotencia de los dioses de la viesca, non yera belordería.

De toes formes, estos camientos nun fueron a separtar la natural curiosidá que de siempres amosó Aedrics por tolo que lu arrodiaba. Porque ye ciertu que taba naquel castru, pero ya nun s’alcordaba de comu yera satamente, magar que non pasare munchu tiempu de vinir ver al agora fináu Asurics. Y colos estrozos y esfarrapamientos de la griesca escontra los "En-Sin-Nome", ¿cómu taría l’aldega? Meyor ocasión qu’aquella nun se-y presentaría otra vuelta.

Al empar d’espurrir les patuques ¿por qué nun dir pa enriba les muries del castru y nortiar dende aende la casa de Brehom?.

Lo poco que pudiere ver Aedrics de Dob-Ar foi lo qu’arrevelare había dos díes, cuandu col so collaciu entraren a taramiellos pela portiella del meyudíe ente’l llarimar pol fumu de fogueres, el golor a carnizu amburáu, y el glayíu de la xente n’armes. Poco foi lo que viere cuandu d’esa frasca tovieren d’esguilar mediu afogaos, ente cabañes y muries esbarrumbaes, y maderos encesos y estoupantes, pa ver de metese a carrenderes na cuerria a la que los llevaren los soldaos del castru.

Dob-Ar remembra un reñil pola forma que trai el so espurrimientu siguiendo el gran coldu a manzorga, sigún se sigue’l calce, que fai el ríu del mesmu nome. Les muries siguin el marxe drechu del ríu y acaben nos sos estremos, tres percorrer unes dos vares, con sendes portielles, bien fuertes y ferraes, que curien los caminos del meyudíe y septentrión que salen del llugar, amás de facer lo propio cola portiella del naciente.

Nel castru muerren casique tolos caleyos que baxen de la gran cordolame del meyudíe d’aquella faza de la viesca. Caleyos que xuben y xuben ensín descansu fasta que nes cumes que malpenes s’albidren, allalantrones ya inalgamables, l’aire del iviernu faise ñeve y el del branu cuasimente nun ye a calecer los cuerpos de los arrechos homes de la balse que caltienen la vaqueirada, les relaciones de comerciu cola tierra erma d’Astyr y Zoal. Llugares peralloñaos, de los que cunten, quienes dalguna vegada los vieren, que son escosos n’agua y verde, pero bona semadera de centén, escanda y otros granos.

Metanes l’aldega, tornó ver Aedrics el fortín-palaciu de los cabezaleros y del Conseyu de los Grandes de les Castres, sitiu nel que s’alluga’l tronu, l’ayalgueria y l’atroxaderu principal d’armes y mercaderíes. Víase la so perfecha planta rectangular, cola base en piedra calizo ensucho, y na so metada superior aperiáu en madera recio de faya y carbayu, con pindia techume tamién en madera.

Dende los altos ventanos y saeteres, xuru que se vía tola aldega.

Toles maderes tiníales bien cargaes de prestosa y trabayada talla, remembrando guerreros y animales de la viesca, debuxos imposibles d’árboles y fueyes, y la misteriosa xeometría de los símbolos Kelt que caltienen el mundu que flui dende’l Wallol al Gwell.

Y estremáo per caleyes ente cases circulares mas o menos nobles, de cote a los llaos del septentrión y del meyudíe del palaciu, curien les respeutives portielles del castru otros tantos fortinos que xixilen y dan abellugu al gruesu de la guarnición del castru.

Aedrics, fixándose nestes coses, y nes clares conseñes qu’amosaben llucha y tracamundiu (cases amburaes, maderes carbonizaes, ropes estrizaes...) nun fue a garrar la paz d’espíritu pola que naguaba.

El díe abría, y entamaba a oyese y a vese más y mas xente peles cais de l’aldega. Lloríos y quexíos de mayores. Sorrises, carreres y folixa de nenos revolvicos. Dibilluriu y trafuelgu de xente iguando cases y coses.

Bramente, la vida siguía alitando en castru.

Aedrics, pasín ente pasu, foi xubiendo les costanes qu’empobinaben a les muries del poniente. Estes muries taben asitiaes talmente al carel del esgoladeru que fixerese nel calce del ríu al erosionar l’agua’l macizu calcáreu qu’alluga’l castru. Una gran perede caliza cai a plombu so la marxe drecha del calce dende les altures, y enriba d’esti caidón, nortien los cuatro vientos les muries de poniente, qu’acompanguen al ríu baxando selemente nel so altor fasta aportar al llugar del pequeñu cai del castru que s’asitia de cote a la portiella del setentrión, nel marxe isquierdu del ríu.

Nun fixo falta xubir a les muries pa escuchar el ruximientu asonsoñador del agua fluyendo pela base del cantil fluvial. Viendo esto, entrugose Aedrics cómu foi que los "En-Sin-Nome" pudieren xubir per aquel llau, tal y comu dixere aquella muyer que-yos presentare a Sairina. Yera imposible que vinieren per equí, porque amosaba’l llugar ser, nidiamente, el de mayor torga pa talos fechos.

Xubió el máxicu la subidoria de piedra de la muria ensín dicir un res a los soldaos qu’andaben perende faciendo la ronda matutina. Llevar les torques de la druidada tien les sos ventaxes.

Dende ellí enriba, el castru apaicía empozáu pola borrina de fumu blancu que trai un fuebu qu’ambura madera y paya magoso. Les áscuares yeren abundatibles pa escontra la portiella del naciente, que se vía bien corrompinada de xente del común y d’armes, traxinando nun se vía bien, qué coses. El golor a carnizu amburáu yera notoriu.

Otros homes, colos lloreos de la grandeza menos aparentes, pero ensín dubia tan héroes comu los sos amos o los sos dueños, carbonizaben en talandories de madera y paya al ventestate, faciendo’l so personal camín al Wallol. Porque ye bien ciertu, dende que los homes lo son y hai castres na tierra, que la muerte namái iguala al home nel so suañu y duelgu, porque na fama y ruximientu, solo nobles y héroes nos dan los sos nomes.

Y taba Aedrics nestos camientos, cuando oyó que dende abaxu lu llamaben pel so nome. Miró y vio que yera’l vieyu Morkan Ar-Ausa acompangáu d’otru paisanu que nun conoció de manu. Saludó, y baxó pa atopase al pie de la muria.

N’efeutu, yera Morkan, y el otru home que nun conociere, que yera tamién home mayor, yera Gwodel, un collaciu de Morkan qu’ésti presentó-y el mesmu díe en qu’aportare a la covayona.

Tres de los saludos, cayó Aedrics en que Morkan taba, o cuidosu, o reconcomíu pola forma de falar, a lo baxino, y de mirar pa tolos llaos, desconfiatible.

Morkan pidió al máxicu que lu siguiere, diben dir a la so casa, que xustamente taba al otru llau del pueblu, xunta la portiella del naciente. Asina qu’ensín falar muncho mas, enfilaron les estrenches caleyes, costana embaxu. Un pocu mas pellá, Morkan siñaló-y a Aedrics una curiosa buelga d’un pie, o cosa asemeyada, qu’amosaba pertenecer a dalgo non d’esti mundu pola so forma de pie espantible. Pero nun fue a fixase más porque Morkan nun paró a dar desplicanza dalguna.

Pasaron los collacios, silentes, ente’l fortín norte y el palaciu y resalvando unes cuatru palloces, aportaron a la que yera la casa de Morkan sigún esti dixo. Enriba del cargaderu la portiella taba talláu lo que semeyaba un raposu.

Llimpiaron les calces na antoxana y abriendo la portiella de la casa, cutieron a un llugar fríu y desanxeláu, escuru y tenebríu fasta que daquién abrió un machinal, y pel ventanucu entró daqué de clarixa amatagada pel pelleyu qu’encobertaba’l furacu.

— Sabéi, collaciu Aedrics, que Yerguer Atta —entamó dicir Morkan dempués de trancar la puerta y d’invitar a que se sentaren los presentes— acaba mandar matar a Wironics. Nun sabemos porqué manda facer esta ignominia. Pero arrevelamos que tien daqué que ver cola sucesión del cabezaleru Fexim Cann. Y tamién sabemos que vos nun sois ayenu a esta cuestión.

Aedrics fincó sorprendíu. Daveres sorprendíu.

— ¿Cómu sabéis esu? —entrugó cuidosu.

— Enantes d’arrespondevos, contestaime primeru: ¿qué sabeis vos de la sucesión na cabezalería de Dob-Ar y qué ye lo que fai tan pelligrosu al cabudarmes Wironics, tantu comu pa que’l mesmu Yerguer deseye la so muerte?.

Aedrics, anque con ciertu reparu, cuntó a los presentes los fechos qu’arrodiaron l’angonía de Fexim, lo del nomamientu de Wironics y la ufierta a ésti, delantre de dos testigos soldaos comu elli, de la cabezalería de Dob-Ar. Y pa finar, la sorpresa que llevose al conocer el camudamientu de voluntá sucesoria qu’operare el morribundu Fexim a favor del so hermanu Lokan, per aciu del mesmísimu Yerguer.

N’oyendo estu, Morkan torcigañó’l focicu y alendó fondamente, pa lluéu dicir:

— Esu desplica abondes coses. Ente elles, qu’atoparen coraos esta nueche a dos soldaos que guardaben la portiella norte.

— ¿Los testigos....? —Dixo esmolecíu Aedrics.

— Ye posible.... —dixo Morkan, que quedó pensatible. Entamó a pasear pol fríu ámbetu de la cabaña, y coles manes coyíes al espaldar entamó dicir con voz atristayada:

— Agora ta claro porqué-yos fadia Wironics. Y si-yos fuñe’l cabudarmes...vos....., Aedrics... —detúvose Morkan pa siñalar al máxicu y siguir diciendo darréu— vos nun-yos cafiareis menos. Porque vos conocéis la voluntá verdadera de Fexim Cann.

— Ya nun teo dulda dala de qu’hai un infame componedoriu ente los homes de Lokan Mann, n’especial Yerguer Atta y otros nobles de la castra Brehom, pa siguir col poder de Dob-Ar y servir asina los sos porgüeyos personales.

Sacantes la voz de Morkan, y el soníu amatagáu de los sos pasos sobre un pisu de tierra escamplanáu, denguna otra cosa oyíase naquel llugar.

— El Feneyu Sucesoriu foi francíu —siguió falando Morkan mentantu diba y vinía— y vos, collaciu, comu bridem que sois, sabeis perbién lo que va pasar. La xente de la feine nun lo consentirá. Nin los nobles de munches castres de Dob-Ar, porque, comu bien conoceis, si se frayen los Feneyos y los vezos ¿qué sedrá del orde de les castres?.

Un entrugu retóricu que nun alguardaba rempuesta dala. Pero Aedrics tamien tinía daqué qu’entrugar.

— Diciime, Morkan, ¿comu ye que sabeis lo que foi na sucesión y tolos xareos qu’al so rodiu fueron? Si nun vos molesta, esclaraime: ¿a quién servis vos?.

Tornose Morkan pa mirar fixamente al máxicu. Pero nun tevo de futi-y la pregunta , que de xuru alguardaba dalgún díe d’aquellos, ya que contestola ensín amosar sentimientu hostil dalu.

— Nos... —fixo un demán de cumplíu, al empar que posaba la so mandrecha sol pechu— servimos al bon gobiernu que truxo a Dob-Ar el gran Brehom Mann. Cuéntovos...— y Morkan dexó de movese pel cuartucu, pa dir sentase al dellaú d’Aedrics.

— Sabéi, qu’enantes d’elli, les lluches estantines de les castres, amás de les aspiraciones hexemóniques del vecín castru de Les Ar-Rondes, teníin sapozáu al nuesu pueblu na mas abegosa llaceria. Brehom Mann foi quien a finar con aquel cáncanu de griesques, xunió a les castres y punxo los cimientos de la grandeza y el respetu de Dob-Ar ente los pueblos de la viesca.

— El gran Brehom foi perintelixente. Foilo abondo comu pa decatase de que los meyores homes pa la guerra o el gobiernu, nun teníin que tar a espetaperru ente los de la so castra. Dalgo que nunca nun-y perdonaron dalgunos de la so sangre, ente ellos, el so fíu primoxénitu Lokan Mann, al que nos, conocemos comu "el llocu" porque nun amosa más finxu na so vida que servise de la fama de la so castra pa los sos escuros ya inatalantables porgüeyos ya industria…

Tomó fuelle Morkan, pa siguir:

— ...Namái el fíu pequeñu, Fexim Cann, llamáu a la cabezalería a despechu del primoxénitu Lokan, quinxo siguir cola obra de so Pá col sofitu del Feneyu Sucesoriu, y la nuesa axuda. Pero ya conoceis el so destín. Porque dubio muncho, dúbiolo daveres, que fuera’l fierru de la borrina el que lu matare…

Nueva pausa. Nuevu esneldíu pa siguir falando.

— ...Nunca se viere qu’un cabezaleru, comu Brehom, arrodiárese de los meyores y mas sabios homes d’un castru pa facer un bon gobiernu, y gran exércitu, ensín mirar primeru de qué castra yera. Fecer esto foi dexar ensín xacíu la mazcaya y estúpida llucha de dalgunes castres importantes pol poder del castru. Pero dalgunos del so propiu sangre vieron, y ven, nel fechu d’entemediar el poder, un pelligru pa los propios Brehom, castra que lleva nel tronu de Dob-Ar dende hai abondo tiempu. Quiciavis abondo daveres.

Comu Morkan quedare pensatible y silenciosu, Aedrics vio propiciu facé-y una nueva entruga:

— Faláis comu un Brehom...y la raposa repolita’l montante de la puerta. ¿Ye’l casu que lo sois?.

— Sois grande, Aedrics, grande de veres. Yo soi brehom’ud, ciertamente, pero hai nesta aldega xente de la nuesa cuerda que non lo ye. Bramente somos un ensame xente de les diferentes castres del pueblu que puxamos por facer un bon gobiernu al mou comu lo fexere el gran Brehom Mann y el so fiu Fexim. Porque’l tiempu de les castres trunfantes en castru ya pasó, bon Aedrics.

— Denguna de les castres de Dob-Ar tien agora homes bonos, y con xacíu enforma, comu pa llevar darréu un bon gobiernu, o la llucha escontra la borrina prieta. Busques per onde lo faigas, nun atopareis, bon collaciu, otru Brehom Mann o otru Fexim. Nin ente los G’Arbias, nin los Werisa, Araum o Wiromenics. Y Fexim sabíalo.

— La esperanza del nuesu pueblu pa resalvar estos murnios tiempos tá nuna manu fuerte, pero con tientu; arrecha, pero prudente. Y pa munchos, Fexim, y el so cabudarmes Wironics yeren la meyor solución pa siguir el llabor del gran Brehom Mann y ser un gran pueblu de la viesca.

— Agora, si faise la voluntá de Yerguer y de Lokan, namái alguarda la griesca y la probitú. Albidro mal negociu pal futuru d'esti pueblu.

Aedrics quinxo llevantar un pocu l’ánimu de Morkan, que taba bien esmolecíu.

— Vamos, hom, non sedrá pa tantu. ¿Por qué sois tan pesimista, Morkan?.

— Tenemos oyíos nel Conseyu de los Grandes de les Cestres. L’aire qu’arrodia al nuevu cabezaleru Lokan ta envelenáu dafechu polos conseyos de Yerguer y un collaciu d’esti. Comu si non fuere abondo que Lokan ya tea allunáu, agora Yerguer y los sos collacios train intriga y odiu al alma esmolecia d’un home ensín bonos finxos. Y ye esta xente qu’arrodia a Lokan la que va trayer gran duelgu a esti pueblu, porque falen muncho y malo del restu los nobles, y semen l’odiu faza los qu’envidien. Inda falen mal de vosotros, los máxicos d’Ar-Bas.

Aedrics quinxo dexar les coses clares una vuelta mas:

— Ya vos dixi, Morkan, que somos ayenos a los negocios del poder que vos traigais ente manes los nobles de Dob-Ar. Nin un res se mos perdiere nos xareos sucesorios. Colaremos en dos díes faza Xexia y cuidaremos de dexar afitaos ente los dotrinos que mos apurristis sabencia abonda comu pa tener bonos guaridores. Non esperes que faigamos abondo más.

— Pero vos caltenéis la cabera voluntá de Fexim...Vos soi bridem y tenéis de facer valir el Feneyu Sucesoriu... —Protestó un migayín Morkan.

Aedrics contestó-y un pocu solliviáu, polo curtio:

— Conozo les mios obligaciones.

Darréu, pa baxar un migayu la tensión, esclarió a Morkan l’asuntu:

— De toes formes, tal y comu tenéis l’asuntu, nun veo que facer valir el Feneyu Sucesoriu vos vaiga trayer la paz. Pueo dir al Conseyu y dicir la "Torga Primera", pero ¿non sedría más cuerdo facelo cuando les coses tean más tranquiles? Yo prometovos tornar perequí dempués d’aportar al cumal d’Ar-Eum; y dicir delantre del Conseyu de los Grandes de les Castres toles torgues del Feneyu Sucesoriu. Entóncenes, toi xuru que’l Conseyu oirame pacetible. Porque metanes el trafuelgu y dibilluriu nel que tamos agora, nada de lo que diga tomaríase cola xusta midida que merez el llabor del bridem. Asina veolo, Morkan.

Morkan quedó pensatible, pero’l collaciu que taba con ellos dixo:

— Tien razón, Morkan. Agora nun ye’l tiempu. Que cumpla la so misión y que torne. Entóncenes sedrá.

— Val, val. A lo meyor toi enquivocáu. Ún ya nun sabe qué ye lo meyor.... —dixo Morkan— de toes formes, sedrá meyor que vos, bon Aedrics, y el vuesu collaciu Wanics, entainéis pa colar de Dob-Ar. Los homes de Lokan y Yerguer xixilen per dayuri, y esmolezme camentar que nin la vuesa fama nin les nobles torques de la druidada que lleváis puedan parar un cuchiellu asesín a sueldu de quién sabe.

Fincaron los tres en silenciu de nuevu.

Morkan púnxose de pies, y franciolu pa siguir.

— Mentantu Lokan Mann tea’l so culu en brazu del tronu de Dob-Ar, cualquier cosa pué asoceder.

N’oyendo estes pallabres, Aedrics remembró otru llugar y otru tiempu. "El culu nel brazu del tronu..."

Ya cayeren abondes estaciones dende que n’Ar-Bas el nuevu cabezaleru, daquella Terics, casique acompanga al Wallol al so predecesor, el bon cabezaleru Wir. Porque, n’efeutu, mentantu non s’amburare el calabre del cabezaleru muertu, coles sos armes, riqueces y muyeres, dengún sucesor podría sentase nel tronu vacíu ensín vese allanciáu del senu la propia castra. Sicasi, el cabezaleru "in pectore" podía presidir los festinos y banquetes asitiáu nel tronu, pero namái sentáu nun de los brazos de piedra que tien tou tronu Kelt. Y Terics, d’aquella, chumare tantu midre fuerte, que zarapicando comu un babayu, cayó dende’l brazu del tronu y fo a argayar cola so tiesta la llábana que tinia a los sos pies.

— A lo meyor, aquel fostiazu fixo de Terics meyor cabezaleru de lo que s’arrevelaba de manu… —camentó sorriendo pa sigo, Aedrics.

El cuartucu caleciere un migayu per aciu les persones que taben nelli, pero inda asina, la fría magosidá trescalaba los güesos de los presentes.

Mokan, de pies, nun paraba de dir y vinir, y tando nesta llabor fixo una reflesión que bramente nun alguardaba rempuesta, pues repetíala comu salmodia retórica de mal dotrín:

— Van matanos a Wironics y nun somos fer un res. ¿Nun habrá brazu en Dob-Ar qu’apare destín tan cruel?.

Asina una y otra vuelta, fervexando. Bramente ya noxaba tanta representanza d’impotencia y desesperu.

Nestu, púnxose’n pie el collaciu Gwodel, y espurriéndose un migayín, dixo:

— Hummm...., Morkan, daveres qu’esti ye un llabor dixnu de Kuérnigu...

Morkan calló, pero siguió fervexando pel cuartu.

— ¿Kuérnigu? —entrugó pa sigo Aedrics.

Pero nun-y dio tiempu a entrugase más nada, porque Morkan, d’esmenu, dio-y una palmotiada en llombu pa dicir:

— Acabose, bon Aedrics. Preparái les alforxes. Avisarevos cuandu podáis colar del castru ensín riesgu pa la to vida y la del to collaciu. Y non escaezáis la promesa que fixisteis equí güei: tornaréis pa falar delantre’l Conseyu. Agora, salíi a lo roncha y con disimulu dempués que lo faiga Gwodel. Y si nun vos avaga seguir vivu, carmenái la espalda propia y la del bon Wanics. Esperaime na cueva dempués de xintar.

— Si, ye ello que ya teo fame... —Arrepostió Aedrics, poniéndose’n pie y cutiendo de la palloza dempués de que lo fixera Gwodel. Non resalvare’l guiceru la portiella cuandu fixo un caberu entrugu a Morkan:

— Deciime, Morkan. La buelga que me siñalastis enantes, yera de....

Morkan fixo’l demán afirmativu.

Por fin conocía Aedrics con qué taba xugando, si ye que tentar esaniciar a los "En-Sin-Nome" de la viesca d’Aucs-Ewam podía dicise que yera un xueu.