Ik bin geboren op 25 september 1977 in Veendam, en opgruit in Olde Pekel. Dou ik kloar was mit scheule in Stadskanoal, har ik in Stad Finoegristiek studeerd. Veurnoamste richting was Finse toal, mor dou studeerde ik ook Hongoars, n lutje Esties, Mordviens en nog wat toalen. Al mit al studeerde ik vief joar, woarvan twai joar (1997-1998 en 1999-2000) as oetwisselingsstudent in Turku, Finland.
Noa mien studies perbaaierde ik aan slag te komen as underzouker oan Universitait, mor dat ging nait zo makkelek. In zummer van 2001 krieg ik n boan veur n joar as underwiezer Nederlandse toal in Tbilisi, Georgië. Ik was in Tbilisi van september 2001 tot juni 2002. Doarnoa besleut ik weer noar Finland te goan, woar ik ook as underwiezer Nederlands waarkte, en tegeliek perbaaierde mien underzouksveurstel bie te schoaven.
In veurjoar heurde ik dat ik oan slag kon in Stockholm, Zweden, as underzouksstudent oan t Finse Instituut van Universitait Stockholm, en in september verhoesde ik doarhin.
Mien underzouksproject gaait euver de inwaarking dij de Zweedse toal op de Finse toal - veurnoamelek de vurmleer en zinsbouw van t Finsk - har in zestiende en zeuventiende eeuw. Doarveur bekiek ik olde Finske wetsvertoalingen, dij in zeuventiende eeuw oet t Zweeds vertoald binnen (dou was Finland ja n underdail van t Zweedse riek). Wat wol ik doarmit bewiezen? In de eerste ploats is unze kennis euver hou toalen op ainaander inwaarken - veural woar t um zinsbouw gaait - aaibels slim, en ik geleuf dat mien projekt n biedroage doaroan leuveren kin. In de twaide ploats is de inwaarking van Zweeds op Fins nait veul underzocht - wat vrumd is, Finland is immers zeshunderd joar n dail van Zweden west. Ook doaroan hoop ik dat mien underzouk biedroagen kin.
Ik bin n kommunist mit staarke liberoale neigingen. Ik geleuf nait dat de partie veur mie op t moment bestaait, en ik bin zulf nait bezunder aktief op t politieke vlak.
Fiksie -
Gedichten -
Non-Fiksie -
