Pontes de Gatín
( V. Vaqueiro, "Guía
da Galiza Máxica" )
Liber, Pontes de Gatín. (BECERREA) :
En Pontes de Gatín, lugar que serve de porta de acceso aos Ancares, existe unha fermosa, aínda que sinxela, ponte medieval. Eis a lenda que testemuña a orixe da ponte e máis o nome da aldea:
A unha muller preñada aparéceselle o demo
en forma de gato, construíndolle unha ponte para que poida pasar con
comodidade o río (Chao Espina. "Leyendas de Galicia y otros
temas narrativos") . Outra liña da lenda -recollida para quen
estas liñas escribe (Vitor
Vaqueiro) o día 2 de abril de 1994 a un home
idoso en Borqueira-Oselle-Becerreá, na viciñanza das Pontes
de Gatín- especifica que os viciños lle mandan ao diabo que
lles construíse unha ponte, solicitando aquel en troca unha vida. Sabendo
o demo que naquel momento unha muller está en estado de xestación
avanzadísima e a piques de parir, impón a condición de
que, unha vez constrúa a ponte, os viciños haberán de
entregarlle o primeiro ser que naza no lugar. Os viciños aceptan o
pacto e o diabo, con efecto, constrúe a ponte.
Sen embargo acontece que unha gata está tamén a parir e
faino antes que a muller. O narrador da lenda deixa entrever que os viciños
aceptan o trato co diabo porque sospeitan a posibilidade de que sexa a gata
quen primeiro teña descendencia. A viciñanza faille entrega
ao Escuro do gatiño ("gatín" na forma dialectal da
zona), recén nado, co cal conseguen burlalo.
